歡迎光臨廣東茶樓

請大家自備一盅兩件，四圍逛下睇下，得閒就坐低聽下吹吹水

昭叔終於開左間茶樓啦！但係由於資金同能力所限，只能夠開係網上。點都好，都算係向人生理想邁出左一步。其實真系唔怕人笑，昭叔細細個就有一個奇怪的理想，想老左之後，可以返去廣州的中央公園，搵返果個亭，係大榕樹下面，擺張茶几，拉開折凳，一把摺扇，一壺茶，一卷《三國》或者《水滸》，就係度同大家再講一段“三英戰呂布”，或者“智取生辰綱”，或者“貍貓換太子”，就好似返去舊時一樣。

或者有時真系幾傷感，電台講古淨返炒冷飯，亦都少人收聽，中央公園變左人民公園，入邊玩的細路越來越多講外江話，廣東話雖然未至於消逝，但係已經被不斷咁樣逼到出海外。廣東，少左廣東話，又或者廣東話少左廣東，總令人覺得無限唏噓。

昭叔似乎總同語言文化有著不解的緣分，唔需要多講自細晏晝12點或者傍晚6點一定擔凳仔聽收音機播楷叔，梁錦輝講古仔，亦都唔講死慳死抵買落有幾多黃俊英，楊達的相聲錄音帶，昭叔自己都好有幸參與過文化的傳播。

小學果陣就已經興起所謂的“興趣班”，不知消滅左幾多快樂的童年。昭叔的媽媽亦都好特別，竟然無將我擺入語數英之類的補習班，反而我去左學書畫，只可惜無咩長進，似乎有插班去讀過一期話劇班，然後唔知點解又返左去書畫班，直到小學唔知幾時又發現左數學上的天賦，書畫班變成左奧數班，無十年都有八年，直到考上附中，住校，終於先有完整的雙休。一定要感謝附中，係難得的一個高中，居然面對高考都只需要地獄式特訓一個學期，而且哩個學期都只不過係上五天半，對比起身，哩種地獄簡直就係天堂！其餘的五個學期，附中貫徹“素質教育”，大家都可以發展自己的愛好。幫附中賣個廣告：識揀，梗係讀附中！

小學唔係記得好多野啦，除左曵，除左打唔過就走，之外反而最記得同一龍哥合作講相聲，係角落的廣播站入邊，某個午休的時候吧，拿住本“萬用草稿本”，哩本野真係犀利，上面乜都有，算式自然不再話下，摘抄的詩詞，各種速寫，遊戲規則，甚至乎果次去廣播站的相聲稿都係上面！兩個人你一句我一句，對住個麥向全校師生講廣東煲冬瓜的笑料，其他人唔記得，我就好深刻。係唔係因為當時仲係可以由廣州人做廣州市長，先至可以攞出來自娛自樂呢？反正黎子流市長的煲冬瓜亦都係富有趣味。

到左7中，我第一次知道教材原來除左人教同沿海兩個版本之外，仲有一隻叫“鄉土教材”，係7中，特別係物理，化學同歷史科，貫徹鄉土教材最為徹底，因為佢地係用廣東話上堂！簡直係皇恩浩蕩啊！絕對有助於增強記憶，我捱過全普教育的高中，大學，畢業咁多年，至今都仲記得金屬活動性順序，元素週期表都係用廣東話先背得出！可惜7中無學生廣播站，但係有班會級會之類的舞台，同昆記學黃俊英，楊達，表演借電話，真系人生難得有共同興趣。

附中就精彩啦！廣播台居然係要選拔的！正好某一年領導大發慈悲，通過左加入廣東話節目的提議，咁岩係果一年開節目需要人手，居然被我過左關，加入廣播站。可惜我的廣播生涯，甚至廣東話節目的生涯都係好短暫，我淨係做過兩次，一次清談講左下音樂美術，第二次終於做左個專題，講輝黃的武俠曲與詞，為霑叔的離世致敬。似乎收效唔係太好，我好快就被掃地出門，不無遺憾。

後來大學被人賞識，加入推廣嶺南文化的社團，又係做左一兩次，又係無疾而終。昭叔新屎坑三日臭的壞習慣似乎一直都無改善，廣東茶樓唔知道可以開幾耐呢？相信更多的茶客來訪，留低兩句，會令我有動力堅持落去。就好似袁崇煥，大手一揮：掉哪媽，頂硬上！